الرئيسية حراج السيارات أجهزة عقارات مواشي و حيوانات و طيور اثاث البحث خدمات أقسام أكثر ...

» مرسيدس 2014 عنق الكلب ( اقرا )

قبل 2 شهر و 2 أسبوع
آخر تحديث قبل 12 ساعه
#36117014
،
،
،
،
،
آخر علمي بالفلوس وبالراحة يوم اشتريت المرسيدس..
قدر الله علي وشفت واحد من جيراننا من أهل الشام طالع في سيارة مرسيدس فياقرا مع زوجته وبزارينه..
السيارة كانت فضية تلمع والشامي هذا وزوجته وولده وبنته كلهم ما شاء الله تبارك الله حمران عطران..
تخيلت نفسي راكب في المرسيدس وطالع مع زوجتي نتمشى زيهم وناكل كبة مقلبة وطعمية وزعتر في حدا المنتزهات..
نسيت اقول لكم اني من يوم كنت في ثالث ابتدائي وانا أمنيتي اني اصير شامي
بدا الحلم يراودني ليل نهار وصرت اسج واسرح في العمل وفي البيت وحتى وانا اسوق الونيت كنت باصدم كم مرة لأني أسرع أكثر من اللازم لأني اتخيل اني أسوق مرسيدس..
**
بديت أحسب الموضوع من الناحية المادية..
الونيت يسوى عشرين ألف، وعندي كم قرش في البنك باسحبهم، وبيجيني الراتب آخر الشهر، والمناخ بيطلع لي بعد شهرين، وعندي انتداب يمكن يصرف لي بعد ثلاثة أشهر..
إلى الحين وانا اهوجس بيني وبين نفسي كل يوم وما كلمت جارنا الشامي ولا أدري هو بيبيع المرسيدس والا لا..ولا أدري حتى كم موديل المرسيدس ولا كم يسوى في السوق ولا وش مواصفاته..ولكن اهم شي عندي اني اركب فيه مثل الشامي وعياله يمكن في يوم من الايام اصير حمر عطر مثلهم

مرت الأيام وتجمعت الفلوس عندي وصار رصيدي في البنك عشرين مع قيمة الددسن إذا بعته يصير عندي اربعين الف
تجرأت وكلمت الشامي بعد صلاة العصر..
قلت له وحنا طالعين من الصلاة: ابو وسيم المرسيدس للبيع؟
قال لي: ما فيه شي محرم على البيع؟
قلت: كم موديله؟
قال: تسعة تسعين
قلت: يعني عشر سنين وهو يكد
قال: بالنسبة للمرسيدس هذا تمرين بس
قلت: وبكم؟
قال: ما بابيع بأقل من خمسين ألف.
قلت: ما تاخذ مقاطيع؟
قال: شو مقاطيع؟
قلت: ددسن وعشرين الف
قال لا. بدي فلوس بس
قلت: تبيع باربعين؟
قال: اقل من خمسين بريال واحد ما بابيع، والسيارة نظيفة وتعال معي جربها عشان تتطمن.
الحقيقة اني كان بيغمى علي يوم قال لي تعال جربها.
***
ركبت السيارة وكانت اول مرة اركب مرسيدس من الله خلقني..
السيارة كبيرة وكلها جلد وخشب وازرار مدري وش هي له، وريحتها عطر على كبة مقلية على قهوة سوداء على ميرمية..
شغلت السيارة وتمشيت فيها شوي في الحارة وقلت لصاحبها خلاص انزل شريت
قال لي ما تاخذ السيارة لحد ما تجيب الفلوس
قلت الفلوس بكرة تكون عندك
قال: لا جيب الفلوس ونروح للمعارض وانقل السيارة باسمك..
بديت اجهز نفسي جمعت فلوسي في الحساب وتسلفت كم الف وبعت الددسن على واحد من الربع بعشرين الف بشرط يصبر علي الين اشتري المرسيدس
ويوم دبرت الفلوس رحت للشامي وقلت له يا الله هذي الفلوس وخلنا نروح للمعارض
رحنا للمعارض لمعرض واحد يعرفه واكتشفت في المعرض ان الاستمارة مطوفة ولازم فحص دوري جديد ولازم تأمين جديد وحق المعرض خمس مئة ريال
والمهم بديت ادبر الفلوس من هنا ومن هنا وفحصت السيارة وطلع فيها كم شي لازم يتصلح قبل الفحص عشان تنجح في الفحص مثل وزن اذرعة وبعض اللمبات والفرامل والكربون
والحسابة بتحسب..
وأمنت ودفعت قيمة الاستمارة وتغيير اللوحة وفي النهاية وبعد اسبوعين يمكن صارت السيارة باسمي
أخيرا ركبت السيارة وطلعت من المعرض ورحت للبيت وماني مصدق انه صار معي مرسيدس فياقرا
كل من شافني ما صديق واللي يقول اني صرت سواق شيوخ واللي يقول صرت شامي واللي يقول الله يهديك ليش شريتها
وكل واحد له راي

*

الفياغرا معقدة وكل يوم يطلع لك رسالة من الكمبيوتر افحص كذا وشيك على كذا وباقي على الفحص 2000 كيلو متر
وأكثر الأزرار ما اعرف فايدتها وكل يومين اتصل على ابو وسيم أو أروح له البيت عشان يشرح لي شي في السيارة
واذا دخلت الصناعية لازم اروح ورش معينة وأسعارهم وأسعار القطع غالية جدا جدا
وبعدين ما عندي قراش اوقف الفياغرا فيه وكل وقتها في الشمس وصرت اتهاوش مع الجيران على الظلال واوقف تحا اشجارهم وجدرانهم وكل يوم واحد كاتب لي رسالة: يا صاحب الفياقرا لا تزقف هنا والا ترى باكسر قزاز سيارتك
وواحد يكتب ترى بافقع كفراتك لو وقفت هنا يا راعي الددسن سابقا
كل هذا من الحسد والغيرة وانا ورطان وباحل بنفسي وبها السيارة
**
اكتشفت ان السيارة عزمها ضعيف قالوا لي لازم تغير بواجي ويوم رحت اشتري بواجي اكتشفت ان الفياقرا فيها 12 بوجي وكل واحد قيمته 30 ريال وعليك الحساب
غيرت زيت المكينة بمئتين ريال وغيرت زيت القير مع الفلاتر بسبع مئة ريال
وكل يوم مصاريف جديدة وكل كم يوم يطلع لي واحد يقول عندنا زواج وابغى اكشخ في الفياجرا، أو يكون هو العريس وياخذها وبعد الزواج يقفل جواله
أو يجيني واحد يقول باطلع خويتي وابغى سيارة كشخة وفي النهاية أكتشف انه يوصل ركاب طريق القصيم
والمشكلة بقيت زي ما انا لا صرت وسيم ولا احمر عطر ولا يحزنون وزوجتي زي ماهي وكل ما ركبت الفياقرا صكت على عبايتها وصارت تسحب في الشارع والناس يشرون لي عشان انتبه واحسبهم معجبين بالفياقرا أو يبغون يحتكون معي وفي النهاية نوصل البيت وعبايتها متقطعة
مر كم شهر وجاء الصيف واكتشفت ان المكيف عطلان ومن ورشة لورشة وفي النهاية بعد كم الف اشتغل المكيف لكن شغل أي كلام ومراتب الجلد لونها اسود ويبغى لها كم ساعة عشان تبرد وفي النهاية افتح القزاز ارحم لي من الحر
مرت سنة وقررت احط حد للمصاريف والدوخة ورحت لابو وسيم وقلت له تشتري الفياقرا؟
قال: كم حدك؟
قلت له: براسمالها
قال: لا كثير
قلت له: يا قليل الحيا يوم جيت اشتريها منك ما طرحت لي ولا ريال من الخمسين الف والحين تقول كثير

***
باختصار شديد
بعت السيارة على ابو وسيم بثلاثين الف ومن يوم اشتراها ما عاد خربت ولا راحت للورشة
ما ادري هل المرسيدس والبي ام سيارات المانية والا شامية؟
خذت الفلوس ورحت للي شرى ددسني وشريته منه وكسبته الف ريال وارتحت نفسيا لكن ام العيال والعيال مازالوا يحبون المرسيدس

وتبت من السيارات الفخمة
لكن بعد سنتين لقيت ابو وسيم معه رنج روفر كحلي ورقم لوحة مميز
وانا احب الجيوب ويوم شفته انهبلت وطار عقلي
قلت له للبيع؟
قال: قلت لك من زمان ما في شي محرم على البيع يا ابو راشد
قلت : تبادلني بالددسن؟
قال : نصيبك
قلت: بشرط إذا مليت من الرنج ترجع لي ددسني
قال: ما في مشكلة
ورجعت حليمة لعادتها القديمة كل يوم ورش ومشاكل ورحت ادور ابو وسيم قالوا لي نقل من الشقة
واللي يعرف فيكم ابو وسيم يدلني على شقته و اعطيه الرنج هدية لأني بس ابغى افقع وجهه
،
،

(( اهم شي تستانس بالقصهه و تدعي لي و تشوف اعلاناتي يمكن يعجبك شي و تشتريه
مرسيدس 2014 عنق الكلب ( اقرا )
وسيلة الإتصال :
+966565626497

2 عضو ينصحون بالتعامل.

14

›› 5
››   قبل 2 شهر و 2 أسبوع
ودي اشوف ابو وسيم واحب علئ راسه لانه مقدي يوم سوا فيك اللي سوا ههههههههههههههههه
›› 6
››   قبل 2 شهر و 2 أسبوع
يشحت بطريقه احترافيه
››   الحقاني١
›› 7
››   قبل 2 شهر و 2 أسبوع
ههههههههه
رووووعه

اهم شي صرت احمر ولا
لازم تصبغ
››   tallha 4925
›› 8
››   قبل 2 شهر و 2 أسبوع
››   Adil arwe
›› 9
››   قبل 2 شهر و 2 أسبوع
لو انك على الددسن كان مريح راسك
خلك على مجنونك
››   قبل 2 شهر و 2 أسبوع
ابو وسيم هاذا مجرم والله ههههه
››   الحقاني١
›› 11
››   قبل 2 شهر و 2 أسبوع
يبيلك سوريه ويجون عيالك حمران
››   alqyry
›› 12
››   قبل 2 شهر و 2 أسبوع
ويش مع أبو وسيم من سيارة علشان اشتريتها قبلك واصير شامي مثلكم .
››   al.jhny_518
›› 13
››   قبل 2 شهر و 2 أسبوع
ولا احمر عطر
››   maged187
›› 14
››   قبل 2 شهر و 2 أسبوع
كم سعر الاعلان ب سنابك
››   الشعيبي 15
›› 15
››   قبل 2 شهر و 2 أسبوع
طيب الانترا ويش سويت فيها
››   احمد.2019
›› 16
››   قبل 2 شهر و 2 أسبوع
ا
›› 17
››   قبل 2 شهر و 2 أسبوع
كم حدك بالمرسدس انا. شراي ب4000وراي تغيير قطع
››   faisal al - hathli
›› 18
››   قبل 2 شهر و 2 أسبوع
ابغا اعرف وش الزبده الحين
››   fars74735
›› 19
››   قبل 2 شهر و أسبوع
قيمت 2007 ب ٥٠ نضيفه انضحك عليك يا طيب
››   fars74735
›› 20
››   قبل 2 شهر و أسبوع
ولا ذا امهيد عشان نضيفك سناب
››   fars74735
›› 21
››   قبل 2 شهر و أسبوع
تمهيد *
››   قبل 2 شهر و أسبوع
الحين ابغا اعرف انا يوم انزل اعلان وابغا اطول في المواصفات الموقع يقص الكلام وينزله ناقص
ولما واحد يكتب قصة حياته الموقع ينزلها كامله
فين الدوريات فين الشرطه فين المرور فين البلديات عنهم
››   dr-ahmad
›› 23
››   قبل 2 شهر و أسبوع
ياخي انت رهيب والله ان القصه جميله واستمتعت بها
الله يرزقك بروز رايز وتحكيلنا قصتك معها
لو في لايك لأحطلك مليون
››   ابوهيبة2
›› 24
››   قبل 2 شهر و أسبوع
حقيقه استمتعت بارك الله فيك
›› 25
››   قبل 2 شهر و أسبوع
انت مبدع ... ماشاء الله
››   a8781
›› 26
››   قبل 2 شهر و أسبوع
ههههههههههههههههههههه

ان شاء تصير احمر اعطر ههههههههههههههههه
وتصير ريحتك كبه ههههههههه

الله يرجك ي شيخ هههههههههههههههههه
››   ugdd3003
›› 28
››   قبل 2 شهر و أسبوع
هالخمسين لو تزوجت به سوريه كان قلبت حمر عطر وجو عيالك حمران احسن من المرسيدس
››   8098093
›› 29
››   قبل 2 شهر
والله ضحكت من قلبي رغم همي الله يسعدك دنياء واخره
›› 30
››   قبل شهر و 4 أسبوع
اللي يسب المرسيدس أقول له خله لأهله المرسيدس صناعه مافيها كلام وصنعت لناس مرفهه مادياً وليس لناس مديونه او ينتظرو رواتبهم اخر الشهر والقناعه بما عطاك ربك عمرها ماتحطك في مواقف تخليك تروح تتشكى وتنوح اقنع برزقك وماهلك إمرءٍ عرف قدره.
››   اابو سعد.
›› 31
››   قبل شهر
ههههههههههههههههههههههههههههههههههههههههههههههههههههههههههههههههههههههههههههههههههه
الله يسععععدك ياشيخ
›› 32
››   قبل شهر
ابي افزع معك .. واطق ابو وسيم
لا لقيته .. تعال خاص
››   temo24
›› 33
››   قبل 5 يوم و 23 ساعه
انا اشهد انك مبدع والله القصة والاسلوب لحاله ابدااااع ههههههههههههههههه الله يسعدك يا شيخ
›› 34
››   قبل 2 يوم و 23 ساعه
ممكن اذا ترقيت تتعدل نفسيتك

يجب عليك تسجيل الدخول حتى تتمكن من إضافة رد.