قبل ما تستثمر جنيه واحد في أي مشروع، ادرس مشروعك كويس جدًا. اعرف أرقامه، وافهم تسويقه، وادرس السوق اللي داخل عليه. شوف مين التوب في المجال، وليه نجح، وشوف اللي فشل قبله واسأل نفسك: إيه الأسباب اللي وقعته؟ اعرف أفضل الموردين، وقارن بين الجودة والسعر، واعرف إمتى تشتري كاش وإمتى يكون الشراء بالأجل أفضل ليك، وإيه أعلى خصم تقدر تفاوض عليه. ولو تقدر تنزل تشتغل في نفس النشاط سنة، اعملها. الخبرة العملية هتعلمك في شهور اللي ممكن ما تتعلموش في سنين. ولو عندك قريب أو صاحب شغال في نفس المجال، اقعد معاه مرة واتنين وعشرة، واسأله عن كل كبيرة وصغيرة، وافهم البيزنس من جوه. اسأل نفسك: - هجيب أول عميل منين؟ - هخليه يرجعلي تاني إزاي؟ - إيه الميزة اللي هتخلّي العميل يختارني أنا ويسيب المنافس؟ - هل رأس المال اللي معايا يكفي لحد ما المشروع يقف على رجله؟ السوق النهارده بقى أصعب من زمان. اللي مش بيتطور بيختفي، واللي مش بيسوق صح بيختفي، وحتى لو عنده منتج ممتاز، من غير إدارة وتسويق هيكون صعب يكمل. ولو معندكش الوقت أو الخبرة تعمل كل ده بنفسك، استعِن بشركة متخصصة أو استشاري فاهم في المجال، أو حتى شخص أمين وخبير سبقك في نفس النشاط. تكلفة الاستشارة غالبًا هتكون أقل بكتير من تكلفة قرار غلط. في النهاية... حافظ على فلوسك، وخد وقتك في دراسة مشروعك، لأن القرار الصح قبل البداية بيوفر عليك خسائر كبيرة بعد التشغيل. ــــــــــــــــــــــــــــــــــــ محمد الشناوي استشاري تطوير المشاريع والمطاعم ومطابخ الإعاشة أساعد المستثمرين وأصحاب المشاريع في اتخاذ قرارات استثمارية صحيحة من خلال إعداد دراسات الجدوى، وتقييم المشاريع، وتحليل المخاطر، ووضع الخطط التشغيلية، بهدف تقليل نسبة المخاطرة وتحقيق أعلى عائد ممكن على الاستثمار.