2004 الممشى: 292 ألف كيلو السلام عليكم ورحمة الله وبركاته اذكروا الله و صلوا على النبي عندي ربع باترول 2004 ( بخاخ 4500 ) حكومي مفحوص ومجدد تو البودي : صفته زينه ومرشوش كامل ، فيه اثار فك لكن الرفارف الداخليه سليمه الممشى : 292 الف حقيقي محركاته : بلد المكينه : نشيطه وعزمها كفو ، يشتغل بربع نقره حار ولا بارد كلها ما شاء الله القير : تعشيقاته كفو ولا يلك ولا يفلت الكلتش : دعسة بلد ، ومغيّر طقم كامل اصلي (دسك وصحن وفحمه) الدبل : شرط خفيف وثقيل وتعشيقاته وكاله المكيف : على رقم واحد ثلاجه ما شاء الله عضلاته : منفوضه كامله ، جلد الرباطات يبيلها تغيير والمساعدات فيها ضعف زيوته : مغيّره زيوت وكاله (دفرنسات ، قير ، دبل ، مكينه) كفراته : اخت الجديده تاريخها 25 وفيها اكثر من نص عمر وسليمه من الرقع والتحبيل والمسحيه ( جنوط الهلل اللي عليه خارج البيعه) معه جنوط البلد ورشتها زينه وسليمه بطاريته : جديده ديكوراته : زينه وبعضها فيها خياطه والطبلون الامامي ملبّس قماش مقاعده : الاماميه وكاله ونظيفه ،و الخلفيه الاصل تجي بالطول ومبدلها راعيه بمقاعد عرض ملبسه قماش صرفيته : ممتازه وراعيه السابق وازن بلوفه والديلكو ، ومسويله تصفيه كامله وكاله الزيت : ما ينقص ما شاء الله ، لكن فيه ترشيح بسيط بصوفة المكينه الاماميه ولاتنقص زيته الحراره : مايعرفها لا بالمشي ولا بالوقوف ، بالمكيف وبدون ما شاء الله (عليه مروحة مرسيدس اصليه شابكها مع المكيف ، اطيب من الوكاله وكافيه و زود) قزازاته : كامله بلد بختم نيسان (حتى الاماميه وكاله) ومضلل كامل الاديتر : نظيف وسليم وعليه غطاء اصلي السيور : مغيره كامله وكاله الشاصي : فيه حكوك ودقات حصى وبسيطه وماهي ماثره على كلام راعي الورشه وطبيعيه بالجيوب الارباقات : وكاله ولانفكت العيوب : طرف باب السواق وجزء من العاير (فيه معجون) دقه بالصدام الخلفي الايسر لاحقه الاسطب ( ومغيّر) وطرف الرفرف من تحت خدوش بسيطه (عيوب رش) يقولون تروح بالتلميع المائي (لان التلميع المائي يشيل طبقه من البويه وتروح او تخف) واشوفها ماتسوى فيه حكات بالصدام الامامي والخلفي بسيطه ولا هي واضحه (صوت تكتكه خفيفه في الماكينه وضحته بالفيديو ، واذا دعست بنزين تختفي ) وفحصت عند 3 مختصين اللي اثنين قالوا تكايات او عصافير مرتخيه ويبيلها شد ، و واحد يقول بلوفه مرتخيه ويبيلها شد والعلم عند الله ، اتفقوا كلهم اني استخدم ماعليها خوف وان ماله داعي الفك عشان الصوت وبسيط الدبه الوسطيه فيها ضربه و ملحمه وفيها صوت خرفشه الديكورات الداخليه فيها ملاحظات (واشوفها طبيعيه في موتر حكومي) فيه حلى ببطن الموتر النسافه الاماميه جهة الراكب فيها قطع ومخيطه ملاحظه : - المذكور كلام راعيه السابق وفحصي الشخصي للموتر ، ويوم افحص تركيزي على المحركات بشكل عام ، ولا البدي ماهتميت له دام صفته زينه والشواصي سليمه ، والموتر اساسا مرشوش كامل - ما اشرط شي افحص افضل لي ولك الاعلان السابق حذفته واضفت صور وملاحظات تبينت لي فترة الاستخدام التواصل خاص ، وارجوكم لحد يجيني الا قاري